Ábrese o prazo para participar na XXI Feira Medieval de Monforte
O Concello de Monforte aproba as bases do XI concurso de axudas para a confección de traxes medievais, así como as bases para a solicitude de participación na XXI Feira Medieval de Monforte.
A XXI Feira Medieval celebrarase o sábado 19 e o domingo 20 de abril de 2025, coincidindo coa fin de semana de Semana Santa. O alcalde de Monforte, José Tomé, lembra que "o ano pasado, 2024, a Feira Medieval alcanzou a súa vixésima edición, polo que xa solicitamos a declaración de Feira de Interese Turístico Galego, aínda que aínda non recibimos a resolución ao respecto por parte da Xunta de Galicia".
XI Concurso de axudas para a confección de Traxes Medievais
Tras a aprobación das bases, o equipo de goberno abre a convocatoria do XI Concurso de axudas para a confección de traxes medievais. Nesta undécima edición, o alcalde decidiu incrementar a partida destas axudas, pasando a conceder 60 euros por persoa, cando en 2024 eran 50 euros, o que supón un incremento de 10 euros por persoa, é dicir, un 20 % máis. Tendo en conta que poderán ser premiadas un máximo de 60 persoas, a partida total ascende a 3.600 euros, 600 euros máis que en 2024.
José Tomé Roca destaca que "con esta convocatoria queremos animar aos monfortinos e monfortinas a que participen activamente na Feira Medieval, como sempre o fixeron, coa confección dos seus traxes, para o cal poderán participar no concurso de axudas, que convocamos a través das tres radios locais da cidade, desde hoxe martes 18 ata o 28 de febreiro de 2025". Por tanto, o obxectivo deste concurso é aumentar a participación dos veciños e veciñas de Monforte nos diferentes actos da Feira Medieval.
Os veciños e veciñas interesados en participar neste concurso de axudas para a confección de traxes medievais deberán chamar ata o 28 de febreiro de 2025 ás radios Onda Cero Monforte, Radio Principal Monforte Cadena Ser e Radio Monforte, durante o espazo destinado á súa programación local de luns a venres, e responder a unha pregunta relacionada con Monforte formulada pola locutora ou o locutor.
O número máximo de participantes será de 60, e non poderán participar aqueles que xa recibiron a axuda nos concursos de confección de traxes medievais dos últimos tres anos. Cada radio repartirá un máximo de 20 premios nominais ás 20 persoas que acerten a pregunta.
As radios colaboradoras emitirán unha lista o 3 de marzo cos nomes e teléfonos de contacto das persoas que acertaron as preguntas. Estas persoas deberán pasar polo Concello entre o 7 e o 14 de marzo para realizar unha solicitude formal no Rexistro Municipal, para que sexan subvencionadas cunha cantidade máxima de 60 euros por persoa.
Esta subvención deberá ser utilizada na confección e elaboración dun traxe medieval que se exhibirá nos actos da Feira Medieval os días 19 e 20 de abril de 2025. Unha vez emitido o informe polo Departamento de Cultura, no que se verifique que os solicitantes coinciden coas persoas que acertaron a pregunta no programa de radio e que non participaron en concursos anteriores (últimos tres anos), comprobarase que os gañadores están ao corrente das súas obrigas tributarias co Concello de Monforte. Dictarase unha resolución concedendo a condición de beneficiarios a aqueles que cumpran os requisitos, tras verificar que non existe impedimento legal para recibir a subvención.
Os beneficiarios da axuda deberán xustificar a súa participación na Feira Medieval durante os días 19 e 20 de abril, presentándose co seu traxe na Oficina de Información da Feira Medieval, situada na Praza de España. Tras a celebración da Feira Medieval, entre o 21 e o 30 de abril, os beneficiarios deberán presentar no rexistro do Concello de Monforte a factura xustificativa do gasto realizado na tenda colaboradora coa Feira Medieval, onde se confeccionou o seu traxe, polo importe concedido como mínimo, na que conste o pago e o concepto.
Unha vez comprobado que a factura cumpre todos os requisitos legais e que os beneficiarios participaron na XXI Feira Medieval, o Concello emitirá unha resolución recoñecendo a obrigación a favor dos beneficiarios e procederá ao pago das axudas.
Os participantes neste concurso non poderán participar no Concurso de Traxes Medievais convocado polo Concello
Os establecementos colaboradores co Concello de Monforte no Concurso de axudas para traxes medievais son:
- Retales Merce: Rúa Doutor Teijeiro, 38.
- Coser Cosiendo: Rúa Calvo Sotelo, 7.
- Nita Veiga: Rúa do Cardeal, 6 (só adquisición de teas).
- Teresa Lamela Costura: Rúa Doutor Casares, 66.
- Gnomos: Rúa Hermida Balado, 10.
A inscrición no concurso de axudas para a confección de traxes medievais implica a autorización ao Concello de Monforte de Lemos para a recollida e tratamento dos datos persoais dos participantes, coa finalidade de xestionar o concurso convocado polo Concello, así como a publicación dos gañadores. A participación no concurso supón a aceptación de todas e cada unha das bases.
Para calquera cuestión ou aclaración adicional, os interesados poderán dirixirse á Concellaría de Cultura do Concello de Monforte de Lemos (Campo de Santo Antonio, s/n, teléfono: 982 402 501).
Solicitude de participación na XXI Feira Medieval
Tamén na Xunta de Goberno celebrada onte, luns 17 de febreiro, aprobáronse as bases para a solicitude de participación na XXI Feira Medieval.
Estas bases recollen o procedemento de solicitude, a documentación que se debe achegar, así como aspectos relacionados coas características dos postos, a decoración dos mesmos, a utilización de materiais nas súas estruturas, o prezo e os horarios de apertura e peche.
Segundo se especifica nas bases, o prazo de inscrición está aberto desde hoxe, 18 de febreiro, ata o 17 de marzo. Posteriormente, publicarase na páxina web www.monfortedelemos.es a lista de admitidos e admitidas, data na que tamén se indicará a forma de realizar o pago das taxas de inscrición.
A organización da XXI Feira Medieval admite tres modalidades de postos: gastronomía, artesanía e comercio. Do mesmo xeito, darase prioridade ás solicitudes de vendedores e vendedoras de Monforte, así como a aqueles postos de artesanía con carta de artesán ou artesá. Para máis información, os interesados poden dirixirse á Oficina de Promoción Económica e Emprego do Concello (Casitas da Compañía), aos teléfonos: 698 181 551 e 982 884 775, ou ao correo: feiramedieval@concellodemonforte.com.
"O noso obxectivo é que a Feira Medieval de Monforte siga sendo un referente cultural e turístico, atraendo visitantes á cidade e á Ribeira Sacra durante a Semana Santa", concluíu o alcalde de Monforte.