Aberta a votación da 7ª edición do Concurso Fotográfico de Nadal de Segredos de Pantón
A 7ª edición do Concurso Fotográfico de Nadal de Segredos de Pantón abre a súa fase de votación, coa participación de vinte fotografías que capturan a esencia do municipio. As imaxes, tomadas en diferentes localizacións de Pantón, destacan pola súa beleza e creatividade, e reflicten a riqueza paisaxística e cultural da zona.
Os participantes presentaron traballos únicos como 'Senda entre freguesías' Ponte das Bidueiras (Santo Estevo de Espasantes), 'Fervenza de Augacaída' (Santo Estevo de Atán), ou 'Por entre as cruces' Camiño de Cibrisqueiros a San Cosmede (San Vicenzo de Pombeiro). Cada imaxe invita a redescubrir recunchos emblemáticos, dende fervenzas e camiños de outono ata miradoiros e estradas rodeadas de natureza.
As votacións están abertas ao público, a través do seguinte enlace, que pode elixir a súa favorita a través das opcións "Voto por esta imaxe" ou "Non voto por esta imaxe". Este evento, que combina arte e turismo, busca poñer en valor o patrimonio de Pantón a través da mirada persoal de fotógrafos afeccionados e profesionais.
A organización anima a toda a cidadanía a participar nesta iniciativa e a apoiar o talento local, resaltando a importancia de preservar e dar a coñecer os tesouros naturais e culturais do municipio.