A Vicepresidencia da Deputación inviste 48.000 euros para mellorar o acceso a Revide e A Toca, en Quiroga
A Vicepresidencia da Deputación financiará as melloras no acceso aos núcleos de Revide e A Toca, no concello de Quiroga, a través dun convenio de colaboración co Concello polo que a insitución investirá 48.000 euros para acometer estes traballos.
As actuacións centraranse na renovación do pavimento actual, que presenta un deterioro importante, e aproveitarase tamén para substituir un tramo de canal para auga de rega.
O deputado provincial, Daniel García, acompañado polos concelleiros de Participación Social, Servizos Sociais e Normalización Lingüística Xosé Manuel Fernández e de Medio Rural e Medio Ambiente Luis Arias, destacou durante unha visita ao lugar o dinamismo destes núcleos con practicamente todas as vivendas habitadas e varios proxectos de rehabilitación de inmobles en marcha.
“Desde a área de Medio Rural estamos a facer un esforzo por colaborar na mellora das infraestruturas das zonas rurais, xa que somos conscientes das limitacións orzamentarias dos concellos para atender o mantemento da rede viaria, máis no caso de municipios tan extensos como Quiroga”, sinalou García, que explicou tamén que este convenio de colaboración para o arranxo desta pista reforza o apoio da institución provincial ao concello quirogués, que conta cunha asignación de 350.000 euros do Plan Deputación.