A unidade móbil de doazón de sangue visitará Monforte este venres
O próximo venres, 17 de outubro, a unidade móbil da Axencia Galega de Sangue, Órganos e Tecidos (ADOS) estará na Praza da Compañía de Monforte de Lemos, operando de 10.00 a 14.00 horas e de 16.00 a 21.00 horas. Dende o Concello animan a todas persoas que poidan doar a achegarse e colaborar para apoiar a actividade asistencial dos hospitais de maneira efectiva.
Dende ADOS explican que "cada día os hospitais galegos precisan entre 400 e 500 doazóns de sangue para manter a súa actividade", polo que a colaboración cidadá é fundamental. Para garantir reservas suficientes, ADOS dispón de dez unidades móbiles que percorren distintos concellos, recollendo doazóns que logo son procesadas e analizadas nas instalacións centrais. Deste xeito, é posible enviar compoñentes sanguíneos a todos os hospitais galegos e atender a milleiros de doentes durante todo o ano.
Desde a Axencia lembran ademais que para doar sangue é necesario ter máis de 18 anos e pesar máis de 50 quilos. Ademais, é importante almorzar antes da doazón e, se se comeu ao mediodía, agardar dúas horas; non se recomenda facer comidas copiosas. As persoas que acudan deberán levar a tarxeta de doazón, DNI ou documento similar, e un informe médico se están tomando algún medicamento.
Para máis información sobre a doazón pódese consultar ados.sergas.gal ou chamar ao teléfono gratuíto 900 100 828.