A subdelegación do Goberno avanza no dispositivo de seguridade da XXV Mostra do Aceite e a XLIII Feira do Viño de Quiroga
A subdelegada do Goberno en Lugo, Isabel Rodríguez, presidiu hoxe no Concello de Quiroga a Xunta de Seguridade co fin de coordinar o dispositivo da XXV Mostra do Aceite e a XLIII Feira do Viño de Quiroga, dúas citas gastronómicas e culturais emblemáticas da comarca.
Durante a reunión, na que estivo presente o alcalde e representantes da Garda Civil, subsector de Tráfico, Policía Autonómica e Local, así como membros do goberno municipal, analizáronse as medidas necesarias para garantir o correcto desenvolvemento destas celebracións, que cada ano atraen a milleiros de visitantes.
A subdelegada agradeceu o labor das forzas e corpos polo seu compromiso coa seguridade cidadá e destacou o traballo do Concello de Quiroga na promoción destes eventos, que poñen en valor o patrimonio gastronómico e cultural da Ribeira Sacra.
A Feira do Viño de Quiroga, con máis de corenta edicións, e a Mostra do Aceite, que celebra o seu 25 aniversario, xa están consolidados como referentes da tradición vitivinícola e oleícola da zona, sendo escaparates da calidade e autenticidade dos produtos locais.