A quinta edición do Foro Territorios Patrimonio terá lugar en Pantón os días 11 e 12 de decembro
O Foro Territorios Patrimonio é un evento de carácter internacional que un ano máis reúne na Ribeira Sacra ás voces máis interesantes do momento en cuestións como patrimonio, turismo sostible e futuro vitivinícola. Un programa completo de conferencias, mesas redondas e actividades dirixidas a profesionais da cultura e o turismo, así como tamén a un público xeral con interese en profundar nos retos e oportunidades da Ribeira Sacra nunha contorna internacional.
Esta edición do Foro Territorios Patrimonio conta co apoio e implicación da Xunta de Galicia a través da Vicepresidencia 1ª e Consellería de Presidencia, Xustiza e Turismo e a Consellería de Medio Ambiente, Territorio e Vivenda.
O quinto Foro Territorios Patrimonio terá como pano de fondo algunhas das cuestións que máis van marcar o devir dunha zona candidata a Patrimonio da Humanidade desde un punto de vista turístico, ambiental, vinícola, gastronómico, patrimonial, de experiencias, de sustentabilidade e de futuro.
Búscase trazar cuestións que axuden aos actores e sectores da zona para expor as súas estratexias de traballo nun medio-longo prazo, contribuír a xerar lazos de colaboración con outros territorios da humanidade, atraer outros puntos de vista e maneiras de traballar e establecer sinerxias de presente e futuro, como xa se fai desde a orixe deste foro.
Preservación do territorio
O obxectivo deste foro tamén é visibilizar o novo escenario da candidatura da Ribeira Sacra ante a selección de Patrimonio da Humanidade, e a afondar na situación para os próximos anos.
Doutra banda, o pasado mes de setembro, a candidatura a reserva de biosfera da Ribeira Sacra e Serras do Oribio e Courel culminouse despois dun longo camiño, sendo, oficialmente, o sétimo destes espazos declarados en Galicia. Un recoñecemento que terá relevancia no discurso da quinta edición do Foro Territorios Patrimonio.
V Foro Territorios Patrimonio: A conservación e transformación do territorio
A conservación e transformación do territorio configúrase como unha compoñente clave para mellorar o patrimonio natural, patrimonial e cultural dun territorio como a Ribeira Sacra. Contempla actuacións en materia de transformación e xestión do territorio orientadas a diminuír os niveis de tensións e adaptación ao cambio climático, apostando por accións que faciliten a súa adaptación tamén a contornas dixitais.
A transformación dixital, o respecto pola natureza e a creatividade virtual son conceptos que se entrelazan e buscan fórmulas de convivencia para conseguir mellores solucións para unha mesma necesidade: a de gozar do patrimonio dunha rexión xerando riqueza sostible para a mesma. O turismo cultural ten a oportunidade de actualizarse desde unha nova perspectiva que teña en conta a todos os actores da zona, desde o máis pequeno ao máis grande.
Claves para a sustentabilidade cultural e patrimonial
Moitos expertos consideran a cultura como o cuarto piar do desenvolvemento. O pasado mes de maio, o Ministerio de Dereitos Sociais e Axenda 2030 sorprendía coa inclusión da cultura e a súa achega ao desenvolvemento sostible no Informe de Progreso e Estratexia de Desenvolvemento Sostible 2030, un documento que aborda unha serie de políticas e retos a nivel nacional co fin de expor unha estratexia conxunta.
O Foro Territorios Patrimonio quere servir tamén como centro de debate e catalizador desta nova estratexia cuxos obxectivos poñen no centro o triplo impacto económico, social e ambiental, sen centrarse na achega cultural.
Foro Territorios Patrimonio
O Foro Territorios Patrimonio 2021 é a continuidade dun proxecto que impulsa, tanto I-Radia Crea como 17° Ribeira Sacra Festival, como unha ferramenta ao servizo da Ribeira Sacra. Manter a celebración do Foro Territorio Patrimonios en 2021 é importante para garantir a continuidade dun proxecto de relevancia para o territorio, a súa xente e o seu futuro. Toda a información en: https://foroterritoriospatrimonio.com
A actividade terá lugar os días 11 e 12 de decembro no Hotel Iberik Augas Santas doncello de Pantón.
Aforo
Esta nova edición contará con expertos e a participación está principalmente dirixida a profesionais, administradores públicos, investigadores ou público xeral que teñan algunha relación co medio natural. Haberá unha cota moi pequena para as persoas que desexen asistir de maneira presencial durante as dúas xornadas. As prazas son limitadísimas e poden solicitarse no mail habilitado: contacto@foroterritoriospatrimonio.com
O Foro Territorios Patrimonio poderá seguirse de maneira on-line a través da súa canle de Youtube.