Actualidade

As inscricións para participar no Concurso de Compadres estarán abertas ata o 19 de febreiro, e no de Comadres ata o 26 de febreiro

Xoves de Comadres, A Pobra do Brollón

A Pobra do Brollón arranca a conta atrás para o Entroido de 2025, que comezará oficialmente o xoves, 20 de febreiro (Xoves de Compadres). O día 27 será a quenda das Comadres. Ambas xornadas contarán con actividades para todos os públicos, como a tradicional queima das figuras e unha chocolatada na Praza Maior.

Ademais, convócase un concurso de compadres e comadres que premiará ás mellores figuras. Os participantes poderán presentar de forma individual ou en grupo, e o premio será de 50 euros para a figura gañadora na primeira categoría, e de 100 euros na segunda.

Para participar será preciso anotarse antes do 19 de febreiro no Concurso de Compadres, e antes do 26 de febreiro no Concurso de Comadres. As inscricións poderán facerse na Biblioteca municipal 'Antonio Reboiro', tanto de forma presencial coma no teléfono 982 430 546, en horario de 10:30 a 13:30 horas.

Tanto o día de Compadres como de Comadres, a partir das 18:30 horas organízase a queima das figuras. Todos aqueles concursantes na categoría individual que desexen participar deberán concentrarse diante da Casa do Concello ás 18:30 para correr as figuras. A queima realizarase posteriormente na Praza da Peza.

Por outra banda, a Biblioteca Municipal acollerá tamén obradoiros de Compadres e Comadres, que terán lugar os días 14 e 21 de febreiro e que estarán dirixidos á rapazada entre 4 e 14 anos.