A Pobra do Brollón decreta dous días de loito oficial polo pasamento de Ricardo Rodicio González
O Concello da Pobra do Brollón declarou dous días de loito oficial, os 25 e 26 de agosto de 2025, polo pasamento do concelleiro e primeiro tenente de alcalde Ricardo Rodicio González.
Durante estas xornadas, as bandeiras do consistorio ondearán a media hasta e todos os actos oficiais darán comezo cun minuto de silencio en sinal de respecto. Ademais, o día 26 ás doce da mañá gardarase un minuto de silencio ante a Casa do Concello.
O falecemento de Ricardo Rodicio, que exercía como tenente de alcalde desde o ano 2011, supón unha fonda perda para a corporación e para a veciñanza.
Pai, marido, compañeiro e amigo, dedicou 14 anos ao servizo público con integridade, lealdade e capacidade de traballo. Foi tamén impulsor de iniciativas culturais como o festival das Cores de Outono ou os Cantos de Taberna, consolidándose como unha persoa moi activa na vida social e comunitaria da Pobra do Brollón e da súa comarca.
O Concello transmitiu o seu pesar e apoio á familia, en especial á súa filla Flavia, á súa muller Mari Paz, así como ás amizades e persoas achegadas, destacando a dificultade de asumir un falecemento tan prematuro.