A Pobra do Brollón chama á veciñanza a facer un uso responsable da auga
O Concello da Pobra do Brollón pide á veciñanza que faga un uso responsable da auga e lembra que están vixentes restricións no uso da auga procedente da rede municipal de abastecemento, que deberá destinarse exclusivamente ao consumo doméstico.
Segundo informou a administración local, queda prohibido empregar a auga municipal para o rego de hortas e xardíns, encher piscinas particulares ou similares, así como para lavar vehículos, fachadas, patios ou outros espazos.
O Concello explica que a medida adóptase ante a situación de seca e a previsión de escaseza de auga durante o verán. Ademais, comprométese a controlar o consumo nos edificios e instalacións municipais, a supervisar os espazos públicos e a vixiar posibles perdas na rede de abastecemento.
Tamén se fai un chamamento á veciñanza dos núcleos con abastecemento propio para que adopten medidas de aforro, xa que, segundo destacan, “a seca afecta a todos por igual e é fundamental un uso responsable dun ben tan prezado e escaso”. O Concello lembra que calquera infracción será sancionada conforme ao disposto nesta normativa.