A Oficina de Turismo de Chantada recibiu en 2025 a máis de 700 peregrinos
Durante o ano 2025, a Oficina Municipal de Turismo de Chantada atendeu a un total de 731 peregrinos que realizaron algunha etapa do Camiño do Inverno. Os meses con maior afluencia de camiñantes foron maio, xuño, setembro e outubro, concentrando a maioría das visitas entre a primavera e o outono.
Do total de peregrinos rexistrados, o 73,46 % eran de orixe española, destacando Madrid como a comunidade con máis camiñantes (32,15 %), seguida de Galicia (10,81 %), Andalucía (8,34 %), Valencia (4,79 %) e Cataluña (3,83 %). En canto aos peregrinos estranxeiros, a maioría procedían de Italia e Portugal (ambos cun 3,42 %), Reino Unido (2,19 %), Alemaña e Países Baixos (2,05 % cada un), así como Estados Unidos, Canadá e Polonia (1,50 % cada un), e Francia (1,37 %).
Chantada é un punto clave dentro do Camiño do Inverno, situado no quilómetro 100 desta ruta oficial cara Santiago de Compostela. O seu entorno, caracterizado polas ribeiras do Miño e un rico patrimonio románico, atrae cada ano a miles de visitantes e peregrinos.
Para obter a Compostela, que certifica ter realizado o peregrinaxe por motivos relixiosos ou espirituais, os camiñantes deben acreditar ter percorrido a pé ou a cabalo polo menos 100 quilómetros continuos nun camiño oficial, e a última etapa debe ser a inmediatamente anterior á chegada á Catedral de Santiago. Moitos peregrinos elixen comezar o seu percorrido en Chantada debido á súa situación estratéxica no Camiño do Inverno.
A Oficina de Turismo de Chantada ofrece aos peregrinos a posibilidade de selar as súas credenciais e proporciona información útil sobre aloxamentos, restauración, comercio local, horarios de transporte e detalles sobre os seguintes tramos do camiño.