A igrexa de San Vicente do Pino en Monforte será reparada cun orzamento de 115.700 euros
A Consellería de Cultura, Educación e Universidade licita estes días dúas obras en bens patrimoniais de Monforte de Lemos cun importe superior aos 200.000 euros.
Unha das actuacións, cun orzamento de 115.700 euros, estará destinada a substituír o material da cuberta da igrexa de San Vicente do Pino. Repararanse os danos detectados, derivados fundamentalmente da súa localización exposta a situacións climatolóxicas adversas, especialmente fortes ventos que provocaron a perda de tellas, a rotura dalgunhas placas de fibrocemento e mesmo o levantado de elementos de impermeabilización.
Para acometer os traballos será necesario desmontar todo o material da cuberta, formado por tellas cerámicas. Substituiranse as placas deterioradas para volver a executar a nova cubrición co mesmo material e con elementos de ancoraxe e suxeición capaces de soportar maiores presións de vento.
A igrexa do mosteiro de San Vicente do Pino ten a consideración de ben catalogado, ademais de estar incluído en dous espazos declarados Ben de Interese Cultural (BIC), o do conxunto histórico de Monforte de Lemos e o da paisaxe cultural da Ribeira Sacra.
Así mesmo, o delegado sinalou que a Consellería tamén reiniciou o proceso administrativo para a restauración de varios retablos da igrexa do colexio do Cardeal, que quedaron desertos no primeiro procedemento de contratación. Así, destínanse 84.500 euros á restauración do retablo da Adoración dos Reis, púlpito e tornavoz, o retablo do Santo Cristo, e os de San Xosé, a Virxe das Dores, Virxe de Fátima e Santo Antón.
No mesmo templo veñen de restaurase os retablos de Nosa Señora das Escolas Pías e de San Xosé de Calasanz, cun orzamento de 16.800 euros.