A Galiña Azul de Chantada incorporará este curso un servizo de comedor propio
A escola infantil A Galiña Azul de Chantada contará a partir do próximo curso cun servizo de comedor propio, que substituirá ao actual sistema de cátering. O centro, que ofrece atención a nenos e nenas de 3 meses a 3 anos durante 11 meses ao ano, dispón de 75 prazas e funciona baixo a xestión do Consorcio Galego de Servizos de Igualdade e Benestar desde 2008.
As instalacións xa dispoñen de cociña, que está a ser acondicionada para preparar as comidas no propio centro. O Consorcio Galego destina preto de 48.000 euros a estas obras, froito dun convenio co Concello de Chantada.
O alcalde, Manuel Lorenzo Varela, destacou que esta mellora permitirá ofrecer aos pequenos comida elaborada nas propias instalacións e lembrou que a escola foi ampliada hai dous anos para alcanzar as prazas actuais.
Mentres o Concello executa as obras, a Xunta será a encargada de contratar o persoal necesario para o novo servizo. A Galiña Azul reabrirá en setembro co cadro de persoal habitual, quedando por cubrir unha praza antes de outubro.