A Deputación pon en valor o turismo de proximidade no Courel
A Deputada de Réxime Interior, Promoción do Territorio e Turismo, Pilar García Porto, participou este sábado en Folgoso do Courel no inicio da xornada Novas Descubertas na Sima Aradeas, que inclúe conferencias sobre o descubrimento de 2 km de novas galerías, salas e pozos desta cavidade no norte das Montañas do Courel. Pilar García Porto puxo en valor esta iniciativa, incluída no programa Outono Xeolóxico que organiza o Xeoparque Montañas do Courel coa colaboración da Deputación, que mantén un acordo de 25.000 euros coa asociación para impulsar este territorio.
Pilar García Porto subliñou que o apoio desta iniciativa responde á aposta da institución provincial “por un modelo de turismo de proximidade, de calidade, sostible e de experiencias que encaixa perfectamente cunha iniciativa turística coma esta, vencellada á ciencia”. Subliñou nesta liña “que esta é a aposta máis axeitada para o noso territorio, porque coida e pon en valor a nosa terra, contribuíndo ao desenvolvemento económico sostible da provincia e poñendo en valor, neste caso, a riqueza xeolóxica, cultural e paisaxística”.
O programa do Outono Xeolóxico conclúe o 23 de novembro, en Ribas de Sil, cun percorrido da Ruta da Cubela con saída desde o Centro de Interpretación do río Sil (CIRS).