A Deputación de Ourense presenta o videoclip de “Lyla”, de Daniel Minimalia, rodado na Ribeira Sacra
A Deputación de Ourense acolleu este xoves a estrea en primicia do videoclip “Lyla”, o novo proxecto audiovisual do compositor e guitarrista ourensán Daniel Minimalia, gravado en diversos enclaves da Ribeira Sacra. O lanzamento mundial será hoxe, 28 de novembro, en todas as plataformas musicais.
O presidente provincial, Luis Menor, destacou durante o acto a dimensión promocional dun traballo que definiu como “unha promoción cultural e paisaxística da Ribeira Sacra de Ourense sen precedentes”. Menor agradeceu tamén ao artista que “sempre volva á casa” e subliñou o seu papel como “gran embaixador da nosa terra”. Considerou, ademais, un “luxo” que a provincia puidese desfrutar en exclusiva deste adianto do seu próximo álbum, “TR3ZE”.
O vídeo, financiado pola Deputación, foi rodado en escenarios emblemáticos como o canón do Sil, o mosteiro de Santa Cristina ou a igrexa de San Pedro de Rocas, entre outros espazos de forte carga simbólica. Formará parte do sexto traballo discográfico de Minimalia, que dará pé a unha xira internacional con paradas en Berlín, Europa Central, Estados Unidos e Asia.
Minimalia expresou a súa “ilusión de levar Ourense por diante” e reivindicou a “mística” e a “identidade” que aporta a Ribeira Sacra ao novo videoclip.
Recoñecido como o primeiro galego en acadar un Grammy Latino, o músico é tamén o primeiro español en obter dous Hollywood Music in Media Awards. Na súa traxectoria figuran cinco álbumes publicados —Akainik, Cuentos Sonoros, Arenas de Luna, Origen e Terra— ademais do libro La Música Que Llevas Dentro (2022). “TR3ZE” será o seu próximo lanzamento discográfico.
No single “Lyla”, editado por Audio Maze Music, Minimalia conta coa colaboración da cantante internacional Ekaterina Shelehova, cuxa voz —popularizada pola actuación viral “Earth Melodies” en Italia’s Got Talent en 2021— combina ópera, canto ancestral e espiritualidade, engadindo profundidade ao proxecto.