A Deputación de Ourense mobiliza unha nova partida de axudas para concellos e impulsa o PAI de Valdeorras e Ourense Sur
A Xunta de Goberno da Deputación de Ourense vén de dar luz verde a un conxunto de actuacións que suman máis de 788.000 euros en investimento público, combinando fondos europeos e liñas de cooperación cos municipios da provincia.
Durante a sesión celebrada hoxe, o goberno provincial avanzou na posta en marcha dos Plans de Actuación Integrados (PAI) de Ourense Sur e Valdeorras, considerados proxectos estratéxicos cofinanciados con fondos FEDER. Neste marco aprobouse a contratación das asistencias técnicas encargadas da súa execución, cun orzamento global de 305.560,64 euros, repartido a partes iguais entre ambos plans.
Estes programas integrados aspiran a mobilizar no seu conxunto arredor de 14,5 millóns de euros e pretenden impulsar actuacións de desenvolvemento territorial, sostibilidade, innovación e cohesión social, co obxectivo de mellorar servizos e dinamizar a economía local.
Por outra banda, a Deputación aprobou tamén un novo paquete de axudas de cooperación municipal por valor de 482.899,96 euros, dirixido a dez concellos da provincia. Estas achegas permitirán financiar actuacións en infraestruturas e servizos básicos, especialmente en municipios de menor tamaño.
Os concellos beneficiados son A Mezquita, Leiro, Baños de Molgas, Chandrexa de Queixa, Esgos, Oímbra, Rairiz de Veiga, Rubiá, Verea e Vilardevós.
Desde a institución provincial subliñan que estes acordos reforzan a cooperación cos concellos e contribúen a unha distribución máis equilibrada dos investimentos, aproveitando tamén o financiamento europeo para impulsar proxectos de maior impacto no territorio.