A Deputación de Lugo e a Xunta apoian a celebración da Queima das Fachas de Castelo
A parroquia de Castelo, en Taboada, prepara unha nova edición da Queima das Fachas. A Vicepresidencia da Deputación de Lugo colabora na organización desta festa do lume, declarada Festa de Interese Turístico de Galicia
A deputada de Cultura, Iria Castro, participou na presentación da Queima das Fachas de Castelo, en Taboada, que se celebra esta fin de semana, na noite do 7 ao 8 de setembro coa colaboración da Vicepresidencia da Deputación de Lugo.
A queima das fachas, ao redor dunha trintena, faise no castro de Castelo. A Asociación Cultural As Fachas revitalizou e mantén viva esta festa tradicional con lume na que participan boa parte das casas da parroquia, que se encargan de facer as fachas cun pé de madeira e agucios.
No acto, Iria Castro remarcou “a importancia da implicación da veciñanza para dar continuidade a esta tradición e manter o patrimonio inmaterial e material que conforman a nosa identidade” e sinalou “o compromiso da Vicepresidencia da Deputación de Lugo co tecido asociativo que desenvolve un papel fundamental na dinamización cultural e social das parroquias”.
No acto, ademais da deputado provincial, participaron o presidente da asociación, Manuel Fidalgo, o alcalde de Taboada, Roi Rigueira, o concelleiro de Cultura de Taboada, Manuel Diéguez, e Javier Arias, delegado territorial da Xunta en Lugo.
A Queima das Fachas de Castelo, declarada Ben de Interese Cultural e Festa de Interese Turístico, é unha das tres festas do lume que se conservan en Galicia, xunto a de Vilelos, no Saviñao, e a de Castro Caldelas.
A Asociación Cultural As Fachas participa en xornadas e outras iniciativas de difusión e estudos das festas do lume na Península.
Pola súa parte, o delegado territorial da Xunta en Lugo, Javier Arias, destacou que o Goberno galego renova un ano máis o seu apoio a esta cita a través das axudas a concellos para potenciar as Festas de Interese Turístico de Galicia. Deste xeito, a Xunta colabora cos gastos de organización, difusión e promoción das actividades.
O delegado resaltou a singularidade e espectacularidade da Queima das Fachas e puxo en valor o traballo da asociación cultural As Fachas e dos veciños e veciñas de Castelo para garantir que esta tradición perdure no tempo.