A Deputación aproba a licitación do equipamento do complexo turístico Augas Mestas
A Deputación de Lugo aprobou este venres por 171.497,15 euros a licitación do contrato de equipamento do complexo turístico Augas Mestas. Unhas instalacións situadas “nun enclave natural de gran beleza, á beira do Río Sil, en Quiroga, para que os veciños e veciñas da provincia poidan volver desfrutar deste complexo turístico”, destacou a voceira socialista, Pilar García Porto
O contrato, que conta cun prazo de execución de dous meses, divídese en dous lotes. O primeiro afecta ao mobiliario en xeral, no que se inclúen elementos de protección contra incendios, contedores de lixo, equipamento para piscina, estantes, sofás; mobiliario para adecuar os vestiarios do cámping e da piscina, así como dos aseos da cafetería e os bungalows. Pola súa banda, o segundo lote estará destinado a mobiliario de cociña como forno de gas, cheminea ou lavalouza, así como elementos para adecuar o comedor, con mesas, cadeiras ou taburetes, entre outros.
“Como vedes, cumprimos coa palabra dada e estamos a dar novos pasos para que Augas Mestas volva ser un espazo ao servizo da veciñanza. Un espazo que ademais, dinamizará a economía da zona, xerará novos postos de emprego e converterá esta instalación nun atractivo máis dentro da oferta turística da nosa provincia”, rematou a Deputada.