A Consellería de Medio Ambiente mellorará antes de final de ano a sinalización e o equipamento no Souto de Rozavales

Os traballos consistirán na renovación e mellora da cartelería e do mobiliario recreativo, así como na creación dun paseo máis accesible entre a vila medieval e o monumento natural

Monumento Natural Souto de Rozavales

A Consellería de Medio Ambiente, a través do Servizo de Patrimonio Natural, levará a cabo antes de que remate o ano a renovación e mellora da cartelería e do mobiliario recreativo no Monumento Natural Souto de Rozavales.

Ademais, instalaranse postes, frechas e balizas para facilitar o percorrido entre a Vila Medieval de Manzaneda e o Souto de Rozavales, creando un paseo máis accesible, visible e atractivo para os visitantes.

Desde o Concello de Manzaneda explican que, para a elaboración deste plan, o consistorio colaborou activamente na identificación das necesidades de sinalización, achegando imaxes e axudando na configuración e edición do trazado dixital do paseo natural.