A compañía Quinquilláns levará á Pobra do Brollón a función “Cousas” en homenaxe a Castelao
No marco do Ano Castelao, a Pobra do Brollón recibirá este sábado 30 de agosto a compañía Quinquilláns coa súa adaptación teatral da colección de relatos “Cousas”, que combina traxedia, comedia e farsa. A peza aborda temas centrais da obra orixinal, como a ecoloxía, a solidariedade, a emigración e a xustiza social.
A xornada comezará cunha visita teatralizada á exposición “Sempre en Galiza. 1944-2024”, tras a cal, despois dun breve descanso para que o público poida seguir explorando a mostra, dará comezo a representación da obra “Cousas de Castelao”.
O espectáculo terá lugar na Casa da Cultura Olga Novo, a partir das 20:30 horas, e ofrece unha oportunidade para achegarse á literatura de Castelao a través dunha experiencia artística e participativa.