A CIG reclama melloras nas condicións laborais do persoal e na atención as usuarios de DomusVi Monforte
Este venres tivo lugar diante da residencia DomusVi de Monforte de Lemos unha concentración organizada pola CIG para reclamar melloras nas condicións laborais do persoal e unha atención adecuada ás persoas usuarias. Esta protesta chega tras as denuncias sobre as malas condicións que se estarían dando no centro, especialmente en aspectos como a alimentación e a hixiene.
Desde a Unión Local da CIG denuncian que “a dirección do centro está presionando e chamando ás traballadoras para que asinen un documento no que se afirma que as condicións na residencia son boas”.
A CIG-Servizos de Lugo-A Mariña pon o foco na escaseza de persoal nas residencias privadas en comparación coas públicas, o que provoca unha carga laboral excesiva para os traballadores, que en moitos casos non teñen cobertura das baixas. Tamén alertan do elevado número de baixas por problemas físicos e psicolóxicos relacionados co esforzo e a presión que sufren.
Outro dos puntos críticos é o convenio colectivo, que está caducado desde 2023 e establece condicións laborais e salariais moi inferiores ás do sector público, “cunha media de 5.000 euros menos ao ano para unha traballadora dun centro privado”, explica Xosé Paz da CIG-Servizos.
Ademais, a central sindical apunta directamente á Xunta de Galicia, pola súa responsabilidade no control das prestacións e na situación laboral que se vive nestes centros, e demanda inspeccións máis rigorosas e unha maior dotación de persoal para o control. Tamén reclaman que non se fagan públicas as datas das inspeccións para evitar que as empresas preparen o centro de forma artificial para aparentar cumprir os requisitos legais.