A CHMS somete a información pública a mellora da estrada do canal de regadío do Val de Lemos
A Confederación Hidrográfica do Miño-Sil (CHMS), organismo dependente do Ministerio para a Transición Ecolóxica e o Reto Demográfico, abriu o trámite de información pública do proxecto de mellora e acondicionamento da estrada do canal do regadío do Val de Lemos, no municipio lucense de Monforte de Lemos. A actuación conta cun investimento previsto que supera os 1.600.000 euros.
Durante o período de exposición poderanse consultar tanto o proxecto técnico como a relación de bens e dereitos afectados pola actuación. A documentación estará dispoñible nas oficinas da CHMS e na súa páxina web oficial. Ademais, a listaxe de persoas e propiedades afectadas tamén poderá revisarse nas dependencias do Concello de Monforte.
O obxectivo deste trámite é que as persoas interesadas poidan presentar as alegacións ou observacións que consideren oportunas. O prazo de exposición pública será de 20 días hábiles a partir do día seguinte ao da publicación do anuncio no último dos boletíns oficiais —BOE e Boletín Oficial da Provincia de Lugo—. Neste caso, o período abrangue do 23 de febreiro de 2026 ao 23 de marzo de 2026, ambos incluídos.