A CHMS avanza na procura de solucións que eviten a degradación da Ribeira Sacra
![CHMS-Ribeira-Sacra](https://ribeirasacraxa.com/wp-content/uploads/2024/05/CHMS-Ribeira-Sacra.jpg)
José Antonio Quiroga, presidente da Confederación Hidrográfica do Miño-Sil (CHMS), organismo autónomo dependente do Ministerio para a Transición Ecolóxica e o Reto Demográfico, avanza na procura de solucións que eviten a degradación da Ribeira Sacra.
Neste sentido, Quiroga, acompañado do comisario adxunto, Alberto de Anta, mantiveron un encontro de traballo coa Administración Autonómica, representada polo director dá Axencia Turismo de Galicia, Xosé Manuel Merelles; a directora de Patrimonio Natural, Marisol Diaz; e o subdirector de Conservación e Restauración de Patrimonio Cultural, Manuel Chain; no que se deu conta dos resultados do exhaustivo 'Estudo sobre a navegación e a atracada na Ribeira Sacra', elaborado pola CHMS e finalizado en decembro de 2023.
Ademais de detallar o Estudo e establecer unha mesa de diálogo, durante o encontro tamén se constituíu a Comisión de Seguimento representada polas autoridades presentes, co fin de velar polo cumprimento das solucións técnicas acordadas a nivel técnico, cuxo “obxectivo último é harmonizar o uso sostible do río, co valor paisaxístico e patrimonial da Ribeira Sacra, imprescindible para unha nova candidatura a Patrimonio da Humanidade”, explicou Quiroga.
Ambas Administracións quedaron emprazadas en datas próximas para novas reunións, a nivel técnico, “co interese de concluír as solucións para esta zona protexida, de referencia a nivel mundial, na que o turismo constitúe un recurso económico fundamental”, incidiu o presidente.