A Asociación Fonte do Milagro instala o seu tradicional belén na Mesa dos Catro Cabaleiros
A Asociación Fonte do Milagro instalou un ano máis o seu tradicional Belén na Mesa dos Catro Cabaleiros, en Pena dos Corredores, un punto emblemático que simboliza a unión entre os concellos de A Pobra do Brollón, Incio, Samos e Folgoso do Courel, e que se consolidou como un punto de encontro tradicional para a comarca.
Como en anos anteriores, a Asociación organiza un sorteo de agasallos para quen visite o Portaliño. Entre os premios atópanse un xamón doado pola propia Asociación Fonte do Milagro, dous botes de mel cedidos por Abaella Brava e dúas botellas de viño D.O. Ribeira Sacra achegadas pola Adega Val do Frade.
Para participar, só é necesario subir ao Portaliño, facerse un selfie onde apareza o Belén e etiquetar á organización en Facebook. Así obterase un número para o sorteo, que terá lugar en directo a través desta rede social o 11 de xaneiro de 2026 ás 12:00 horas.