A Asociación de Municipios do Camiño de Inverno reuniuse en Quiroga para abordar as iniciativas da agrupación para 2026
Esta mañá celebrouse na Casa da Cultura de Quiroga unha asamblea xeral extraordinaria da Asociación de Municipios do Camiño de Inverno, integrada por unha vintena de municipios que percorren esta ruta desde Ponferrada ata as catro provincias galegas.
A reunión estivo presidida por José Luis Rivera, alcalde de Quiroga e vicepresidente da asociación. Durante a asamblea analizáronse as contas e o avance dos proxectos en marcha.
Entre as iniciativas máis salientables destaca a incorporación do trazado completo do Camiño de Inverno á plataforma Wikiloc, facilitando así o acceso a toda a información para os municipios asociados. Tamén se valorou a participación na feira FairWay en Santiago de Compostela e informouse sobre unha auditoría dixital realizada para avaliar o uso e eficacia das redes sociais da asociación.
Ademais, comunicouse a invitación para participar na Asamblea da Federación de Asociacións do Camiño de Santiago, onde se debateu, entre outros asuntos, a etapa que conecta A Rúa con Quiroga, unha ruta longa e con escaseza de servizos.
Dentro dos proxectos previstos para este ano tamén figura a produción dun vídeo corporativo destinado a promocionar a asociación en feiras como FITUR, así como a gravación dunha reportaxe para o programa "La Aventura del Saber" de RTVE.
Finalmente, durante a asamblea presentáronse varias propostas para desenvolver en 2026, buscando continuar impulsando e promocionando o Camiño de Inverno e os municipios que o integran.