A Asociación de Municipios do Camiño de Inverno celebra o décimo aniversario da súa oficialidade como roteiro xacobeo
A Asociación de Municipios do Camiño de Inverno celebrou este mércores na Feira Internacional de Turismo (Fitur 2026) o décimo aniversario da súa oficialidade como roteiro xacobeo e presentou un novo vídeo corporativo xunto coas súas liñas de actuación.
A presentación tivo lugar no stand da Xunta de Galicia, no pavillón 9 de IFEMA, onde se deron a coñecer medidas centradas principalmente na mellora dos servizos ao peregrino, na dixitalización e comunicación, nas alianzas cunha maior implicación do sector privado e no reforzo da promoción profesional.
Creada no ano 2018, a asociación está conformada polos concellos da Proba do Brollón, A Rúa, Boqueixón, Carucedo, Chantada, Lalín, Monforte de Lemos, O Barco de Valdeorras, O Saviñao, Pantón, Ponferrada, Priaranza do Bierzo, Puente de Domingo Flórez, Quiroga, Ribas de Sil, Rodeiro, Silleda, Vedra e Vilamartín de Valdeorras.
Dende a asociación márcanse como obxectivo para os vindeiros anos a mellora da experiencia das persoas peregrinas e o reforzo da identidade dun dos roteiros máis singulares do Camiño de Santiago.