Ponse en marcha o 'Programa de acollida e inclusión social do colectivo inmigrante' en Monforte
O Concello de Monforte vén de poñer en marcha un novo programa dende a Concellería de Servizos Sociais e Discapacidade e dirixido a promover e facilitar a inclusión social do colectivo de inmigrantes do concello monfortino.
O Concello, no seu proxecto anual de servizos sociais comunitarios municipais, contempla actuacións específicas de prevención e inclusión social de colectivos en situación de vulnerabilidade social.
Neste senso, co afán de ofrecer a integración da sociedade monfortina a este colectivo de poboación inmigrante, o alcalde deu orde á Concellería de Servizos Sociais de tramitar unha subvención á Consellería de Política social da Xunta de Galicia, que lle foi concedida o pasado mes de novembro de 2023 para o desenvolvemento do “Módulo de asesoramento técnico especializado en materia de estranxeiría” dentro do 'Programa de acollida e inclusión social do colectivo inmigrante', ao abeiro da Orde do 06 de setembro de 2023, pola que se establecen as bases reguladoras que rexerán a concesión de subvencións ás entidades locais para programas de inclusión social da poboación xitana, inmigrante e outras persoas en risco de exclusión, para os anos 2023 a 2025.
Así, este 'Programa de acollida e inclusión social do colectivo inmigrante' ten como finalidade favorecer a inclusión sociolaboral das persoas inmigrantes veciñas do Concello de Monforte a través de actuacións orientadas á inclusión básica e residencial, a mediación social e intercultural, a formación adaptada e a información, asesoramento e apoio nos trámites legais en materia de estranxeiría ás persoas usuarias dos Servizos Sociais municipais.
Neste módulo de asesoramento técnico especializado en materias propias de estranxeiría, enmárcanse accións como a información, asesoramento e apoio nos trámites precisos para as autorizacións e renovacións de residencia, homologación de títulos, reagrupamentos familiares, nacionalidade e outras cuestións relacionadas coa normativa española en materia de estranxeiría.
Para o seu desenvolvemento, o Concello contratará especificamente a un asesor xurídico especializado, dende o mes de abril de 2024 e ata finais do mes de marzo de 2025. O acceso a este programa realizarase a través dos servizos sociais comunitarios municipais, solicitando cita previa coa traballadora social de referencia, no 982 416 541, que será a encargada de valorar a situación e realizar a derivación ó programa.