Comezan as clases de instrumentos, canto e baile na nova Escola de Música de Taboada
Comeza a actividade na nova Escola de Música de Taboada, que naceu neste curso 2023-2024 coa finalidade de ensinar a desfrutar e participar da música a toda a veciñanza da vila.
Así, desde as 16.00 horas deste luns comezaron a sonar os primeiros acordes baixo as instrucións do noso profesor Mike Spinelli, encargado das materias de música moderna, guitarra, baixo, ukelele e canto.
Por outra banda, ás 20.30 horas, o alumnado de baile tradicional interpretou as primeiras pezas da escola, seguindo as indicacións do profesor Lois. E xa o martes a actividade continuou cos alumnos e alumnas de Música e Movemento Piano Trompeta e Linguaxe Musical.
As persoas que queiran apuntarse a algunha destas actividades aínda poden matricularse segundo o seu nivel a través do correo escolademusicataboada@gmail.com ou de maneira presencial no horario de secretaría de luns e martes de 16.00 a 19.00 horas no Cuartel Vello.