18 establecementos do sur de Lugo beneficiáronse das achegas da Xunta para melloras da competitividade
A Xunta de Galicia destinou máis de 155.000 euros a apoiar actuacións de mellora da competitividade en 18 comercios da Zona Sur da provincia de Lugo, pertencentes ás comarcas de Lemos, Chantada e Quiroga. Os fondos proceden das axudas concedidas en 2025 pola Consellería de Emprego, Comercio e Emigración para impulsar iniciativas de dixitalización, modernización e sustentabilidade ambiental no sector comercial e artesanal.
O delegado territorial da Xunta en Lugo, Javier Arias, deu conta deste balance no transcurso dunha visita a varios establecementos beneficiarios, coincidindo coa apertura dunha nova convocatoria destas axudas, que conta cun orzamento próximo aos 4 millóns de euros. Segundo explicou, este programa permite financiar proxectos orientados á innovación, á mellora das instalacións e ao uso de solucións máis sostibles nos negocios locais.
Durante o percorrido, Arias coñeceu de primeira man as actuacións desenvolvidas en Monforte de Lemos por empresas como The Closet e Gourmet Gallego, dedicadas á venda de moda e alimentación, respectivamente. Neste concello concedéronse un total de trece axudas, ás que se suman dúas en Quiroga e unha en Chantada, Carballedo e O Saviñao.
As subvencións estrutúranse en tres liñas compatibles entre si, centradas na dixitalización e innovación comercial, na modernización das instalacións e na sustentabilidade ambiental, especialmente no uso de embalaxes. Entre as novidades da convocatoria actual inclúense a simplificación dos trámites administrativos e a axilización tanto da concesión como dos pagamentos anticipados, ademais da ampliación do período subvencionable para cubrir actuacións realizadas desde o peche da anterior orde, o 25 de outubro de 2025.
O delegado territorial salientou que estas axudas forman parte do Plan Estratéxico do Comercio de Galicia 2025-2030, que recolle 74 accións específicas destinadas a reforzar un sector que considera clave para a economía galega.