William Burgos ficha polo CB Chantada
O Ucoga Seguros CB Chantada continúa a confeccionar o seu cadro e anuncia a incorporación do pívot William Burgos, segunda fichaxe do conxunto que dirixe Alberto Fafián.
Burgos, de 22 anos, e 2,04 metros de altura chega procedente do CB Cuarte de Zaragoza, tamén de Tercera FEB. Natural de San Lorenzo (Paraguai) e internacional coa súa selección, incorpórase á escuadra de Chantada para reforzar a pintura e aportar centímetros ao xogo interior.
Na súa experiencia na Tercera FEB asinou unha media de 10 puntos por encontro, cun 49,1% de acerto en tiros de dous e un 31% en triplas, ademais de 7 rebotes por partido.
Coa súa chegada, o CB Chantada suma físico e solvencia baixo o aro, un perfil que se une ao cadro de xogadores cos que xa traballa Alberto Fafián co obxectivo de manter o equipo competitivo unha campaña máis.