Queda clausurado o XXII Simposio sobre a Ensinanza da Xeoloxía que tivo lugar en Quiroga
A deputada de Réxime Interior, Promoción do Territorio e Turismo, Pilar García Porto, participou na clausura do XXII Simposio sobre a Ensinanza da Xeoloxía que se celebrou nas Montañas do Courel grazas á Deputación de Lugo, que achegou 20.000 euros para a súa organización á Asociación Española para a Ensinanza das Ciencias da Terra (AEPCT).
No acto, que tivo lugar no Auditorio de Quiroga, García Porto estivo acompañada polo presidente do Xeoparque, Roberto Castro, e destacou “eventos como este, que chegan ao rural e son verdadeiras apostas para contribuír ao equilibrio territorial”.
Sinalou tamén a deputada o compromiso da institución provincial co Xeoparque, lembrando que a Deputación “fomos a principal administración galega que traballou xunto cos Concellos de Quiroga, Folgoso do Courel e Ribas de Sil para conseguir a declaración de Xeoparque Mundial Montañas do Courel, o primeiro recoñecido en Galicia no ano 2019”.
Unha colaboración que, segundo valorou, “evidenciamos apoiando iniciativas como esta que poñen en valor e difunden o enorme valor deste territorio”.
Agradeceu tamén o labor dos docentes por inculcar a conciencia polo medio ambiente ás novas xeracións, sinalando que aínda que o patrimonio natural sexa un legado de séculos e que “pareza eterno”, “a súa fortaleza o fraxilidade depende dos coidados permanentes que cada xeración é capaz de prestarlle. Penso que o exemplo deste simposio, e o éxito da fórmula do xeoparque, é un sinal de que imos polo bo camiño. De que a conciencia medioambiental non só se consolida, senón que crece ampliando os seus horizontes”, valorou.
O programa do XXII Simposio sobre a Ensinanza da Xeoloxía que tivo lugar estes días no Xeoparque do Courel contou cun amplo programa de actividades entre as que destacaron conferencias, mesas redondas, talleres e actividades culturais e lúdicas para 175 profesores especialistas de toda España interesados en cuestións de interese científico e didáctico que teñen que ver coa xeoloxía.