O SLG-CCLL e a Deputación de Lugo poñen en marcha un ciclo de conferencias sobre a situación dos viticultores da Ribeira Sacra
O Sindicato Labrego Galego-Comisións Labregas (SLG-CCLL), en colaboración coa Deputación de Lugo, presenta o ciclo de conferencias "O futuro das persoas viticultoras na Ribeira Sacra". A iniciativa busca xerar un espazo de debate sobre o futuro do sector vitivinícola nesta Denominación de Orixe (DO), nun contexto marcado pola falta de medidas de apoio ás produtoras por parte da Consellería do Medio Rural.
O ciclo desenvolverase en varios concellos da Ribeira Sacra lucense desde marzo ata a época de vendima, comezando o venres 7 de marzo, coincidindo coa 42ª edición da Feira do Viño de Chantada. "Dada a situación actual da DO, consideramos fundamental proporcionar información sobre aspectos clave como axudas, contratos, custos de produción e o mercado do viño tinto", explican desde o SLG.
As primeiras sesións estarán dedicadas a cuestións relacionadas coas axudas ao sector. En concreto, abordarase a Intervención Sectorial Vitivinícola (ISV 2024-2027), un programa de fondos da Política Agraria Común (PAC) que financia, entre outras accións, a reestruturación e reconversión do viñedo e a colleita en verde. Para iso, o 7 de marzo, de 16:00 a 19:00 horas, no local do Sindicato Labrego en Chantada, a secretaria técnica da Unión de Agricultores y Ganaderos de La Rioja (UAGR), Leticia Olasolo Viteri, explicará como se xestionaron estes fondos na DO Rioxa, onde se aplicaron medidas para paliar os efectos da crise do sector. "A Rioxa implementou axudas específicas para compensar a perda de rendas das persoas viticultoras, algo que solicitamos reiteradamente á Consellería do Medio Rural", sinala o sindicato.
Na mesma xornada, Andrés Castro Ramos, responsable técnico do SLG, analizará e explicará a aplicación práctica das axudas da PAC para o viñedo da Ribeira Sacra. Posteriormente, nunha segunda sesión que terá lugar preto da vendima, abordaranse cuestións como a Lei da Cadea Alimentaria no sector vitivinícola e a obriga de formalizar por contrato a entrega de uva ás adegas. Tamén se analizarán os contratos incumpridos en 2024 e estudarase a situación doutras DO con variedades tintas en España, Portugal e Francia, así como as realidades ás que se enfrontan adegas de diferentes tamaños.
A crise do sector vitivinícola na Ribeira Sacra foi motivo de preocupación nos últimos anos. En 2024, a negativa de moitas adegas a mercar uva de pequenas e medianas produtoras xerou protestas e mobilizacións na comarca. "Levamos meses insistindo na necesidade de activar medidas de apoio directo ás persoas viticultoras, como se fixo na DO Rioxa, pero a resposta da Consellería foi insuficiente", afirman desde o SLG.
Finalmente, o 30 de decembro de 2024, a Xunta publicou unhas axudas que, segundo o sindicato, "discriminaban ás pequenas produtoras en favor das grandes explotacións e non chegaron a tempo para evitar que moitas colleitas se perderan ou se venderan a prezos de miseria". Ademais, consideran que estas medidas non ofrecen protección ante unha posible nova crise na vendima de 2025.
Desde o SLG defenden que "salvar a Ribeira Sacra require un plan estrutural e a creación dunha mesa de traballo coa participación de todos os axentes implicados". Mentres tanto, agardan que este ciclo de conferencias sirva como un espazo para a reflexión e o deseño de solucións para un sector que, máis aló da produción vitivinícola, é clave na configuración da paisaxe da comarca e no seu desenvolvemento económico, cun impacto no turismo, nos servizos especializados e na fixación de poboación nun territorio de gran valor cultural e medioambiental.