O PSdeG de Bóveda denuncia a falta médicos nos centros de saúde
A agrupación do PSdeG en Bóveda denuncia que o Centro de Saúde de Rubián e o de Bóveda volve quedar sen médico este mércores, xoves e o luns da próxima semana. A voceira municipal socialista, Carmen Macía, amósase indignada por esta situación que “se está convertendo na norma e non nunha excepción”. “É unha absoluta vergoña e un abandono inaceptable da nosa sanidade pública”, critica.
“Cada vez que o médico pide días libres ou ten algunha incidencia, directamente desaparece a atención sanitaria en Bóveda. Isto non é normal nin tolerable, non é culpa do profesional, é culpa da Xunta que non está facendo as substitucións”, denuncia Macía.
O PSdeG insta á Xunta a tomar medidas urxentes e a garantir a cobertura médica en Bóveda, xa que “non pode ser que a atención sanitaria dependa da sorte ou das circunstancias persoais dos médicos titulares”. Ademais, esixen que o Concello deixe de mirar cara outro lado e presione para que se resolva esta situación. “O Alcalde demostra unha vez máis que prefire seguir as directrices do seu partido antes que defender os dereitos da súa veciñanza”, critica a socialista.
Os socialistas denuncian que a falta de médicos en Bóveda forma parte dun deterioro xeral da sanidade pública no rural. “Nunca estivemos tan mal como agora. Antes, polo menos, había certa rotación de persoal para cubrir os dous centros de saúde do municipio, pero agora nin iso: nin cobren os días libres, nin as baixas, nin as vacacións. Isto xa non se pode consentir”, sosteñen.
“O PP di que quere fixar poboación no rural, pero a realidade é que nos está expulsando por falta de servizos públicos. Sen sanidade, sen médicos, sen coidados para a nosa xente maior, como queren que sigamos aquí?”, conclúe a voceira do PSdeG.