O novo mamógrafo do Hospital de Monforte estará listo na primeira quincena de marzo
A área sanitaria de Lugo, A Mariña e Monforte de Lemos xa adquiriu hai uns días un novo mamógrafo para o Hospital Público de Monforte de Lemos que estará funcionando na primeira quincena deste mes de marzo.
O novo aparello, no que a área sanitaria de Lugo, A Mariña e Monforte investiu 150.000 euros, mellora as prestacións do anterior. Os técnicos encargados da súa instalación xa acudiron hoxe á área de radiodiagnóstico do Hospital Público de Monforte para ver as instalacións, planificar a montaxe do novo equipo, así como a desmontaxe e retirada do anterior.
O novo mamógrafo será instalado estes días e, unha vez verificado o seu correcto funcionamento, prevése que estea operativo a mediados deste mes de marzo, cumprindo así co compromiso adquirido pola área sanitaria de Lugo, A Mariña e Monforte de dar unha resposta áxil e eficaz e de buscar a mellor solución para este centro hospitalario.
Mentres tanto, e de xeito provisional, as mulleres que teñan que ser sometidas a unha mamografía, así como as que participan nos cribados de cancro de mama, pertencentes ao distrito sanitario de Monforte de Lemos, serán atendidas no HULA. A tal efecto a Consellería de Sanidade, a través da Dirección xeral de Saúde Pública organizou a actividade proporcionando transporte gratuíto ás mulleres para que se despracen a Lugo para a realización das mamografías do programa de cribado, que se levarán a cabo no centro de saúde da Praza de Ferrol.