O alumnado do IES A Pinguela participa nun proxecto de educación ecosostible
O alumnado de 3º de ESO do IES A Pinguela viaxou recentemente a Melilla, o primeiro destino dentro da nova Agrupación de Centros Educativos que o instituto monfortino conforma xunto co IES Valle del Segura, de Blanca (Murcia), e o IES Leopoldo Queipo, de Melilla. Esta iniciativa foi seleccionada polo Ministerio de Educación para desenvolver un proxecto sobre “Diversidade medioambiental como ferramenta educativa para o fomento da educación ecosostible”.
Durante a súa estancia en Melilla, os participantes tiveron a oportunidade de coñecer unha cidade multicultural que fai fronteira con Marrocos e na que conviven musulmáns, cristiáns, xudeus e hindús. Entre as actividades realizadas, destaca a recepción no Palacio da Asemblea, sede da Cidade Autónoma, onde coincidiron co presidente da cidade, Juan José Imbroda, e o seleccionador nacional de fútbol, Luis de la Fuente. Neste encontro, tamén puideron fotografarse cos últimos títulos obtidos pola selección española, como a UEFA Nations League, a Eurocopa do pasado ano e o Europeo Sub-21.
O programa de actividades incluíu un percorrido pola Melilla Sefardí e visitas ao Museo de Historia, Arqueoloxía e Etnografía da cidade, o Fuerte Victoria Grande e Melilla la Vieja, un enclave fortificado rodeado de auga clave para entender a historia da cidade. Así mesmo, o alumnado explorou os antigos alxibes, as covas-refuxio do Conventico, as covas escondidas e as antigas celas.
No ámbito medioambiental, visitaron a planta incineradora, onde se tratan os residuos sólidos urbanos e se recupera enerxía durante o proceso, así como a depuradora de augas residuais. Tamén participaron en actividades náuticas de kaiak e vela no Club Marítimo da cidade.
Como parte da convivencia co IES Leopoldo Queipo, os estudantes asistiron a unha xornada na que o mago Serapín ofreceu un espectáculo, ademais de presenciar unha exhibición sobre as costumes familiares das distintas comunidades do alumnado do centro, incluíndo a súa gastronomía, relixión, arte e danzas tradicionais.
A semana finalizou cunha visita ao Acuartelamento do Tercio "Gran Capitán" 1º da Lexión, unha experiencia que, sen dúbida, deixará pegada en todos os participantes.
O próximo encontro deste proxecto terá lugar en Monforte de Lemos e concluirá en terras murcianas o próximo curso. Trátase dun programa no que o IES A Pinguela xa participou en convocatorias anteriores con alumnado de 2º e 3º de ESO. A valoración desta iniciativa é altamente positiva, xa que brinda ao alumnado a oportunidade de ampliar horizontes e coñecer distintas realidades dentro de España.