Actualidade

Acusan ao PP de “abandonar á agricultura familiar, ás pequenas produciós e á agricultura familiar” a través dunha orde “pensada só para os grandes grupos adegueiros”

Interior Galego Vivo alerta da situación que están vivendo as persoas viticulturas da Ribeira Sacra, xa que, denuncian, “despois dunha campaña desastrosa en prezo e recollida para moitas pequenas e medianas produciós, agora observamos como a Xunta discrimina, tanto nas axudas á paisaxe canto na inminente liña de poda en verde, a agricultura familiar e o autoconsumo”.

Advirten de que “coa flavescencia dourada ás portas e cos aranceis e a desglobalización galopante en curso iste modo de actuar torticeiro da Xunta equivale a abandonar á súa sorte a maioría dos produtores e produtoras de uva das DOP Ribeira Sacra e Ribeiro, o que vai redundar en inxentes cantidades de viñedos abandonados que, por súa vez, contribuirán a espallar o fitoplasma da flavescencia”. Ademais, critican que “a Xunta continúe sen un estudo de custes serio e fundamenta a poda en verde en prezos medios obviando que as persoas produtoras levan anos en Ribeira Sacra vendendo a perdas e incumpríndose, xa que logo, a Lei da Cadea Alimentar”.

Sinalan que a orde contempla apenas 600.000 euros na súa totalidade procedentes do Fondo Europeo Agrícola de Garantía (Feaga) polo que “a Xunta realmente non pon un peso para o sector”. Explican que no artigo 25 “Cálculo da axuda” recóllese unha compensación do 50% da perda de ingresos nas parcelas que fagan a poda en verde sobre un prezo medio de 1,17 €/kg, o que supón, segundo IGV, “dar por boa a venda a perdas que leva anos dándose na Ribeira Sacra e que suporía 0.58 céntimos por quilo en poda en verde, por baixo do que se pagou noutros territorios do Estado onde é moito máis barato producir un quilo de uva”.

Nos próximos días sairá no DOG a Orde do 4 de abril de 2025, pola que se estabelecen as bases reguladoras das axudas á colleita en verde da viña na Galicia e se convocan para o ano 2025 (código de procedemento MR446C). O texto regula as bases das axudas, en concorrencia competitiva, para a invertención de colleita en verde no viñedo da Galicia e, na súa redacción actual e previsibelmente definitiva, “está pensada para os grandes grupos adegueiros das DOP Ribeira Sacra e Ribeiro, en canto discrimina fulminantemente os viticultores e as viticultoras”, advirten.

Ademais, denuncian “a total opacidade e improvisación nas actuacións da Consellaría de Medio Rural” en canto aos prazos, xa que explican que a orde conta cun “prazo de solicitude ridículo” que se estenderá só ata o 25 de abril. Así, consideran que a Xunta está a “liquida definitivamente os pequenos produtores da Ribeira Sacra” e defenden “que se recoñeza a singularidade do viñedo tradicional de ribeira, e que este tipo de cultivo estexa protexido e apoiado en maior medida, dada a fraxilidade do momento, cunha elevada media de idade das persoas produtoras e coa crise dos excedentes de viño tinto”, e chaman a unha mobilización do sector para pedir “un compromiso firme dos gobernos locais”.