Carballedo acollerá o programa CANDEA para combater a soidade non desexada entre maiores
O Concello de Carballedo acollerá a partir do venres 7 de novembro de 2025 o programa CANDEA, unha iniciativa dirixida a persoas maiores de 65 anos que ten como obxectivo previr a soidade non desexada e ofrecer acompañamento emocional ás familias.
As sesións desenvolveranse na Casa do Concello de Carballedo, de 09:00 a 10:45 horas, e incluirán diferentes actividades como cafés-conversa, talleres de competencias dixitais, grupos de apoio mutuo e acompañamento psicolóxico tanto individual como familiar.
Desde a organización explican que o programa busca crear “novas redes de apoio e espazos de encontro onde compartir tempo e experiencias”, favorecendo o benestar emocional e a participación social das persoas maiores.
As persoas interesadas poden inscribirse ou solicitar máis información a través dos teléfonos 604 039 809 ou 982 46 62 01 (Bea), ou enviando un correo electrónico a candea@arraianas.org.