Bóveda continúa este sábado o programa “Familias Corresponsables. Coidado Compartido” no local social de Guntín
O Concello de Bóveda iniciou o pasado sábado 6 de setembro en Rubián, o programa “Familias Corresponsables. Coidado Compartido”, cun encontro aberto ás familias centrado na reflexión sobre a corresponsabilidade.
O programa continuará este sábado, 13 de setembro no local social de Guntín en horario de 11:30 a 13:30 horas. A actividade estará conducida pola educadora social Paula Santos e repetirase na Raíña o sábado 20 de setembro.
A iniciativa, gratuíta e aberta á toda a veciñanza, pretende promover a idea de que coidar non significa só “axudar”, senón implicarse de maneira activa. Trátase dunha sesión práctica e participativa na que persoas adultas, nenos, nenas e adolescentes conversarán sobre os roles de xénero aprendidos e sobre a importancia de que os homes teñan unha maior presenza nas tarefas de coidado. O obxectivo é que cada membro do fogar se recoñeza como parte desa responsabilidade diaria e contribúa ao benestar común.
Entre as dinámicas propostas está “Quen coida aquí? Isto tamén vai contigo”, pensada para abrir o diálogo, cuestionar hábitos e avanzar cara a unha igualdade real a través do coidado compartido.