As mulleres de Monforte deberán desprazarse a Lugo para someterse aos cribados de cancro de mama

A Consellería de Sanidade informa que, a partir do vindeiro 17 de febreiro e de xeito provisional, co obxectivo de proceder á reparación ou dotación dun novo mamógrafo no Hospital Público de Monforte de Lemos, os cribados de cancro de mama das mulleres do distrito sanitario de Monforte de Lemos se realizarán en Lugo.

A tal efecto, a Consellería de Sanidade, a través da Dirección xeral de Saúde Pública, está a organizar a actividade, proporcionando transporte gratuíto ás mulleres para que se despracen a Lugo para a realización das mamografías do programa de cribado, que se levarán a cabo no centro de saúde da Praza de Ferrol

A Dirección Xeral de Saúde Pública está a proceder ao envío dos SMS cun enlace á web do departamento sanitario galego con toda a información dos horarios dos autobuses.

Esta medida será provisional, mentres non se repare ou se dote dun novo mamógrafo ao Hospital Público de Monforte. Desde a área sanitaria xa se está a traballar para ofrecer unha áxil resposta a esta situación.

No momento en que o Hospital Público de Monforte xa teña operativo de novo o mamógrafo, desde a Consellería de Sanidade procederase a informar de modo particular ás persoas que estivesen citadas para a realización do cribado en Lugo.