Aberto o prazo de reservas para as rutas en catamarán pola Ribeira Sacra da Deputación de Lugo
A Deputación de Lugo abriu este luns o prazo de reservas para as rutas fluviais pola Ribeira Sacra, unha das principais ofertas turísticas da provincia. A tempada 2025 dará comezo o 22 de marzo e prolongarase ata finais de ano, con percorridos que permitirán ás persoas visitantes gozar das impresionantes paisaxes do Canón do Sil e do Cabo do Mundo.
Os billetes poden adquirirse a través da web reservas.rutasembalses.es, onde se ofrece información en tempo real sobre horarios, tarifas e dispoñibilidade das rutas. A plataforma tamén permite modificar reservas e consultar detalles adicionais de forma sinxela e rápida. A Deputación especificou que non se aceptarán reservas por teléfono nin por correo electrónico.
Un éxito consolidado
A Deputada de Réxime Interior, Promoción do Territorio e Turismo, Pilar García Porto, destacou a consolidación destas rutas, que en 2024 foron desfrutadas por máis de 61.000 persoas. “Mantenemos estes dous percorridos porque o éxito do servizo é innegable e o seu impacto económico na provincia é moi positivo”, afirmou.
García Porto subliñou que as rutas fluviais da Ribeira Sacra non só ofrecen unha experiencia turística única, senón que tamén representan un motor económico para a comarca, fomentando o turismo e a dinamización das economías locais.
Ademais, a web habilitada pola Deputación permite consultar a normativa vixente e acceder a tarifas especiais para colectivos como mocidade, estudantes, persoas xubiladas, persoas en situación de desemprego e familias numerosas. As crianzas de ata tres anos poderán viaxar de balde.
Para calquera consulta, a Deputación habilitou os canais de atención ao público a través do teléfono 982 260 196 e do correo electrónico catamaranes.turismo@deputacionlugo.org, en horario de 9.00 a 14.30 horas. A partir do 17 de marzo, o horario ampliarase ata as 20.00 horas.
Rutas e horarios