A XXXIII edición da Festa do Caldo de Ósos presenta o seu cartel
Esta mañá presentouse na sede da Deputación Provincial de Lugo, na Vicepresidencia, a nova imaxe gráfica da XXXIII edición da Festa do Caldo de Ósos. No acto participaron Efrén Castro, vicepresidente da Deputación; Xosé Portela, tenente de alcalde do Concello de Taboada, e Manuel Diéguez, concelleiro de Cultura, Deportes e Medio Rural de Taboada.
O vicepresidente, Efrén Castro, destacou a aposta do Concello de Taboada e da área de Cultura por rescatar e poñer en valor o patrimonio inmaterial vinculado á celebración da Festa do Caldo de Ósos, renovando así un dos principais símbolos de identidade do municipio.
Pola súa banda, Xosé Portela subliñou a importancia de seguir escribindo e resignificando a historia viva da festa e do seu prato estrela, reforzando o lema que xa é emblema da celebración: "Máis ca unha festa gastronómica".
Unha imaxe renovada cun profundo significado cultural
Portela presentou con especial orgullo o novo deseño do cartel da XXXIII edición, unha obra innovadora e de gran valor artístico. A imaxe foi creada pola artista Rosa de Cabanas, cuxa acuarela logra capturar e transmitir a esencia desta festividade.
A ilustración reflicte o profundo imaxinario cultural e social de Taboada, un legado transmitido de xeración en xeración, especialmente polas mulleres do municipio. Portela enfatizou o papel fundamental destas mulleres na conservación da receita tradicional e do ritual cotiá que acompaña a súa elaboración, salvagardando e reconstruíndo unha tradición que segue medrando e nutríndose co tempo.
O deseño de Rosa de Cabanas céntrase en tres eixos fundamentais: muller, ruralidade e natureza. A artista desenvolveu diversas series de ilustracións nos últimos anos, entre elas Mulleres valentes (2021), Mulleres imaxinadas (2022) e Mulleres compañeiras (2023), nas que reivindica a complicidade e o apoio mutuo entre as mulleres ao longo da historia. No 2025, creou Mulleres co Mundo na Cabeza, unha obra que establece o vínculo perfecto entre a súa visión artística e a mirada que desde a Concellería de Cultura se proxecta sobre as mulleres de Taboada: aquelas que, como reflicte o cartel, sosteñen o mundo e o imaxinario da Festa do Caldo de Ósos sobre as sùas cabezas.
Este cartel supón un recoñecemento ao valor de preservar, protexer e transmitir o legado non só do caldo, senón do patrimonio inmaterial e da identidade cultural da localidade.
Unha festa que impulsa o desenvolvemento local
Durante a presentación, Xosé Portela definiu a Festa do Caldo de Ósos como unha plataforma de promoción do desenvolvemento local, na que converxen todos os matices identitarios e culturais do municipio. Máis alá do seu innegable atractivo gastronómico, a festa consolida a Taboada como un destino de referencia para os amantes da gastronomía de calidade. Ademais, pon en valor a produción local e rende homenaxe a un produto de quilómetro cero e máxima calidade, explotando de maneira sostible a riqueza agro-gandeira do territorio.
Portela concluíu a súa intervención convidando a toda a poboación a participar na XXXIII edición da Festa do Caldo de Ósos. Tamén adiantou que o programa de actividades, que se dará a coñecer nos vindeiros días, incluirá propostas para todos os públicos, combinando gastronomía, memoria, arte, música, cultura e lecer.