A Ruta do Viño Ribeira Sacra incorpórase ao club Rutas del Vino de España
A Asociación Española de Cidades do Viño (ACEVIN) vén de aprobar a certificación dunha nova integrante na súa rede nacional de enoturismo: a Ruta do Viño Ribeira Sacra. Deste xeito, a marca Rutas del Vino de España, xestionada por ACEVIN, suma xa 38 rutas repartidas polas principais rexións vitivinícolas do Estado. Este modelo, baseado na colaboración público-privada, na calidade e na implicación dos distintos axentes turísticos de cada territorio, consolidouse como o principal referente do enoturismo en España e inspirou novos proxectos internacionais.
A nova Ruta do Viño abrangue a área xeográfica da Denominación de Orixe Ribeira Sacra, formada por 21 concellos situados entre o sur da provincia de Lugo e o norte da de Ourense: A Peroxa, A Pobra do Brollón, A Pobra de Trives, A Teixeira, Carballedo, Castro Caldelas, Chantada, Manzaneda, Monforte de Lemos, Nogueira de Ramuín, O Saviñao, Pantón, Parada de Sil, Paradela, Portomarín, Quiroga, Ribas de Sil, San Xoán de Río, Sober, Taboada e Trives. Estes concellos distribúense en cinco subzonas: Amandi, Chantada, Quiroga-Bibei, Ribeiras do Miño e Ribeiras do Sil.
Desde o punto de vista enolóxico, destacan as variedades mencía e godello, acompañadas doutras castes autóctonas galegas como brancellao, merenzao, sousón, loureira ou treixadura. O viñedo cultívase en bancais ou ladeiras escarpadas nas marxes dos ríos Miño e Sil, con pendentes que poden chegar ao 70 %, o que converte esta rexión nun exemplo destacado da coñecida como "viticultura heroica".
O valor paisaxístico desta zona compleméntase cun importante patrimonio arquitectónico, que conta cunha das maiores concentracións de mosteiros e igrexas medievais de Europa, moitos deles vinculados historicamente á produción de viño. Esta riqueza natural, histórica e cultural motivou a candidatura —aínda en tramitación— da Ribeira Sacra como Paisaxe da Auga a Patrimonio da Humanidade.
Entre os distintos proxectos impulsados por ACEVIN, o máis relevante é o de Rutas del Vino de España, un club de produto avalado pola Secretaría de Estado de Turismo, Turespaña e o Ministerio de Agricultura, Pesca e Alimentación. Este modelo integra recursos e servizos turísticos en torno a zonas vitivinícolas, cun enfoque auténtico e experiencial.
Rosa Melchor, presidenta de ACEVIN e das Rutas del Vino de España, subliña que “a esencia deste produto turístico baséase nunha estratexia de desenvolvemento socioeconómico integral, na cooperación entre administracións e na posta en valor da identidade vitivinícola de cada destino”.
Estas rutas están deseñadas para ofrecer ao viaxeiro unha maneira distinta de descubrir España, baseada na cultura do viño. De aí o lema "Tu cambio de aires", presente na nova campaña promocional financiada cos fondos Next Generation EU, a través do programa Experiencias Turismo España do Goberno.
Actualmente, Rutas del Vino de España reúne máis de 800 municipios e preto de 2.400 empresas, das cales unhas 800 son adegas. Cada destino debe seguir un Manual de Produto común, que establece criterios de calidade e estándares compartidos, o que permitiu consolidar esta marca como referente do sector enoturístico a nivel estatal.
Coa recente incorporación da Ribeira Sacra, a rede conta xa con 38 rutas certificadas, entre as que se atopan: Alicante, Almansa, Arlanza, Arribes, Bullas, Calatayud, Campo de Cariñena, Cigales, El Bierzo, Garnacha-Campo de Borja, Gran Canaria, Jumilla, La Mancha, La Manchuela, Lleida, Méntrida-Toledo, Madrid, Marco de Jerez, Montilla-Moriles, Navarra, Penedès, Rías Baixas, Ribera del Duero, Ribera del Guadiana, Rioja Alavesa, Rioja Alta, Rioja Oriental, Ronda e Málaga, Rueda, Sierra de Francia, Somontano, Toro, Txakoli, Utiel-Requena, Valdepeñas, Yecla e Zamora.