A plataforma veciñal "Chantada quere sanidade" retoma a súa loita por unha sanidade pública
A plataforma veciñal "Chantada quere sanidade" segue traballando en defensa dunha atención sanitaria pública, digna e universal na comarca de Chantada. O seu obxectivo é lograr un hospital comarcal en Monforte de Lemos cunha dotación de persoal suficiente para atender á poboación da zona. Na tarde do domingo 23 de marzo, a plataforma celebrou unha asemblea que reuniu a máis dunha trintena de veciños e veciñas. Durante o encontro, acordouse por unanimidade retomar as accións en resposta á continua degradación da situación sanitaria na comarca.
Entre as decisións tomadas, non se descartou a reactivación das mobilizacións e o regreso ante a Valedora do Pobo para seguir presionando na demanda de solucións. A plataforma esixirá que se cubran as baixas no centro de saúde, que Chantada conte cun segundo equipo no PAC (Punto de Atención Continuada), e que se inicie o servizo de Hospitalización a Domicilio (HADO), que aínda non está dispoñible na comarca, a pesar de ser un servizo xa instaurado noutras áreas de Galicia.
Ademais, estudiarase a posibilidade de establecer alianzas con outros colectivos e plataformas para loitar xuntamente pola creación dun hospital comarcal en Monforte de Lemos con especialistas, dado que a situación actual demostra unha clara discriminación para os habitantes desta zona, que seguen sufrindo a falta de recursos médicos adecuados.
A plataforma lembrou que, en accións anteriores, impulsaron grandes mobilizacións e conseguiron iniciar un expediente ante a Valedora do Pobo. Nese momento, a Valedora recomendou á Xunta que se buscaran mecanismos para solucionar a falta de cobertura de prazas vacantes e ausencias xustificadas na atención primaria no ámbito rural. Non obstante, a problemática persiste, xa que as baixas de persoal médico e de enfermaría no centro de saúde de Chantada seguen sen ser cubertas.
"Chantada quere sanidade" continuará a súa loita para que se cubran as baixas no centro de saúde, para que se habilite un segundo equipo no PAC e, especialmente, para conseguir a implementación do servizo de HADO, que mellora a calidade de vida de moitos pacientes e as súas familias, e que, incomprensiblemente, aínda non está dispoñible en Chantada, a pesar de que outras comarcas como Ferrol ou Vilalba xa contan con el. A plataforma asegura que non se pode permitir que os pacientes e administrados sexan os que paguen as consecuencias da deficiente xestión sanitaria por parte da Xunta.