A CHMS reforza os traballos de conservación dos leitos fluviais da demarcación
A Confederación Hidrográfica do Miño-Sil (CHMS) intensifica os traballos de conservación e mellora dos leitos fluviais da súa demarcación co obxectivo de mellorar a adaptación ao cambio climático e a prevención de inundacións.
O investimento total destinado a estes traballos ascende a 7.811.922 euros, dos cales o 60 % (4.687.153 euros) procede do Fondo Europeo de Desenvolvemento Rexional (FEDER), no marco do Programa Operativo Plurirrexional de España 2021-2027. A cofinanciación foi aprobada o pasado 11 de marzo, con carácter retroactivo desde 2023.
Estes traballos forman parte do proxecto denominado “Servizo de conservación e mellora ambiental dos leitos da Demarcación Hidrográfica do Miño-Sil en Galicia 2023”, que comezou o 19 de xuño de 2023 e contará cun período de execución de 36 meses. As actuacións céntranse nas provincias de Lugo, Ourense e Pontevedra, e buscan restaurar e conservar a hidromorfoloxía natural dos cauces, mellorar a súa resiliencia fronte ao cambio climático e reducir o risco de inundacións nas zonas máis vulnerables, como núcleos urbanos e áreas agrícolas próximas aos ríos.
O presidente da CHMS, José Antonio Quiroga, explicou que estes traballos están orientados a “conservar e restaurar a hidromorfoloxía natural dos leitos fluviais para mellorar a súa resiliencia e adaptación ao cambio climático”. Ademais, subliñou que se pretende “minimizar o risco de inundacións en núcleos urbanos, infraestruturas e parcelas próximas aos leitos fluviais”. Para acadar estes obxectivos, levaranse a cabo actuacións de restauración das fragas autóctonas de ribeira mediante traballos silvícolas e a retirada de barreiras artificiais que alteran o comportamento natural dos ríos.
Así mesmo, realizaranse traballos de restauración hidrolóxico-forestal para controlar a erosión e protexer as marxes dos ríos, empregando solucións baseadas en técnicas non invasivas e ambientalmente sostibles.
As actuacións, que se prolongarán ata o 9 de maio de 2025, inclúen diversas intervencións nos tres territorios de actuación.
Lugo
No río Cabe, ao seu paso pola Pobra do Brollón, realizaranse traballos silvícolas en 1.650 metros de río, próximos a unha Área de Risco Potencial Significativo de Inundacións e a un Espazo Rede Natura 2000, cun orzamento de 19.710 euros. Tamén no río Cabe, en Monforte de Lemos, levaranse a cabo traballos silvícolas e de restauración da hidromorfoloxía fluvial en 1.195 metros de leito, cun orzamento de 99.900 euros.
Na Pastoriza, no río Miño, realizaranse traballos silvícolas en 250 metros de cauce nunha Área de Risco Potencial Significativo de Inundacións, cun orzamento de 4.050 euros. No río Úbeda, tamén na Pastoriza, eliminaranse obstrucións puntuais en 50 metros de río, cun investimento de 1.350 euros.
No río Sarria, realizaranse traballos silvícolas en 400 metros de leito nunha Área de Risco Potencial Significativo de Inundacións, cun orzamento de 9.450 euros. Ademais, tamén en Sarria, no río Samos, eliminaranse obstrucións en 150 metros de río, cun custo de 1.350 euros.
En Baralla, no río Neira, eliminaranse obstrucións puntuais en 100 metros de cauce, cun investimento de 1.350 euros. No río Miño, ao seu paso polo concello de Lugo, levaranse a cabo traballos silvícolas en 500 metros de leito, nunha Área de Risco Potencial Significativo de Inundacións e Espazo Rede Natura 2000, cun orzamento de 25.650 euros.
Ourense
Na provincia de Ourense, levaranse a cabo diversas actuacións de mellora en varios cursos fluviais. En Allariz, A Merca, Cartelle e Celanova, no río Arnoia, eliminaranse cinco obstrucións puntuais cun investimento de 12.700 euros. En Vilar de Barrio, no canal principal da Lagoa de Antela, realizaranse traballos silvícolas en 3.373 metros de río, nun Espazo Rede Natura 2000, cun orzamento de 21.000 euros.
En Toén, no regato de Alongos, executaranse traballos silvícolas en 660 metros de cauce cun investimento de 10.800 euros. En Viana do Bolo, no regueiro de Valdafranca, realizaranse traballos silvícolas en 100 metros de leito nun Espazo Rede Natura 2000, cun custo de 1.350 euros. Finalmente, en Punxín, no río Barbantiño, erradicarase a vexetación exótica invasora (Phyllostachys aurea) en 102 metros de leito, cun investimento de 10.250 euros.
Pontevedra
Na provincia de Pontevedra, desenvolveranse diversas actuacións centradas na restauración da vexetación e a mellora dos leitos fluviais. En As Neves, no río Termes, eliminarase vexetación exótica invasora (bambú negro, cana común e mimosa) nun tramo de 3.630 metros de cauce, cun investimento de 44.443,18 euros. Esta actuación realízase nun Espazo Rede Natura 2000.
En Ponteareas, no río Xinzo, levaranse a cabo traballos silvícolas en 4.090 metros de cauce, que inclúen unha Área de Risco Potencial Significativo de Inundacións e se sitúan parcialmente nun Espazo Rede Natura 2000, cun orzamento de 41.706,49 euros.